2021 жылдың 1 қаңтары мен 2024 жылдың 1 ақпаны аралығында Қазақстанда жұмыс істейтін ЕАЭО-ға мүше мемлекеттердің 82 845 азаматы БЖЗҚ-ға зейнетақы жарналарын аударып, жеке зейнетақы шоттарын ашты. Сондай-ақ БЖЗҚ ЕАЭО-ға мүше мемлекеттердің 94 азаматына зейнетақы төлемдерін тағайындады.

Естеріңізге сала кетейік, 2019 жылғы 20 желтоқсанда Жоғары Еуразиялық экономикалық кеңестің отырысында ЕАЭО мүше мемлекеттердің басшылары Еуразиялық экономикалық одаққа мүше мемлекеттердің еңбекшілерін зейнетақымен қамсыздандыру туралы келісімге қол қойды. Келісімге сәйкес, ЕАЭО-ға мүше әрбір мемлекет ЕАЭО-ға мүше басқа мемлекеттердің азаматтарына өз азаматтарын зейнетақымен қамсыздандыру құқықтары көлеміне тең деңгейдегі құқықтар берілетініне кепілдік береді.