2021 жылдың 4 қарашасы күні Байғанин ауданы №4 Қарауылкелді орта мектеп-гимназиясының базасында «Кәсіби шеберлік- білім сапасының кепілі» тақырыбында облыстық семинар-практикум болып өтті. Іс-шараға Байғанин ауданынан 78 мұғалім қатысты.
Семинар-практикум жұмысын «Бастауыш класс мұғалімдерінің кәсіби құзіреттілігін арттырудың білім сапасына әсері» тақырыбында Ақтөбе облыстық ғылыми-тәжірибелік орталығы мектепке дейінгі және жалпы орта білім беру бөлімінің әдіскері ф.ғ.магистрі Светлана Жубаеваның кіріспе сөзімен ашылып, Байғанин аудандық білім бөлімінің әдіскері Назгүл Нияздің сөзімен жалғасты. «Жаңаша әдіс-тәсілдерді тәжірибемде қалай қолданамын» тақырыбында Ақтөбе қаласы №65 жалпы білім беретін орта мектебінің директоры, педагог-шебер санатындағы бастауыш класс мұғалімі, НЗМ ДББҰ Педагогикалық шеберлік орталығының тренері М.Жантурина шебер-класс ұйымдастырды.
Ауданның озық тәжірибелі педагогтері 4 кластың Жаратылыстану пәнінен Назгүл Мұстафа «Қаңқа құпиясы», Гүлзада Усманова «Суды қалай тазартады?», Сәндігүл Әзбергенова «Симбиоз деген не?», 1 кластың Математика пәнінен Рыскүл Дауылбаева «7 санын қосу және азайту», 3 кластың Әдебиеттік оқу пәнінен Айнагүл Сейлханова «Алтын сөз», Ғалипа Сақалбаева «Нағыз достық-батылдық» тақырыптарында понарамалық сабақтар көрсетіп, білім алушыларды мақсатқа жетелейтін түрлі тәсілдерімен, көп жылдық тәжірибелерімен бөлісті.
Сонымен қатар Маржан Орынбаева мен Жанат Жарылғасова «Оқу үшін бағалау-білім сапасын арттыру құралы», Жанат Бакенова «Табысты сабақтың өлшемдері» тақырыптарында коучингтер ұйымдастырып, Маншук Куанбаева «Интербелсенді әдістердің мектеп тәжірибесіндегі тиімділігі» тақырыбындағы шеберлік сағатында кері байланыс жасап, өз тәжірибесін ортаға салды.
Семинар-практикум қорытындыланып, қатысушылардың жылы лебіздерімен аяқталды.
Ақтөбе облыстық ғылыми-тәжірибелік орталығының әдіскері С.Жубаева