«Мұғалім мен ЖИ: жаңа форматтағы серіктестік» тақырыбында мұғалімнің іс-тәжірибесі жалпыланды
{gallery}/news/168{/gallery}
2026 жылғы 12 қазанда Ақтөбе облыстық әдістемелік орталығының жоспарына сәйкес «Мұғалім мен ЖИ: жаңа форматтағы серіктестік» тақырыбында шебер-класс ұйымдастырылды. Іс-шараның спикері – Ақтөбе қаласы №80 жалпы білім беретін орта мектебінің директордың тәрбие жұмысы жөніндегі орынбасары, ағылшын тілі мұғалімі Жәкен Нүркен Дәуітбайұлы.
Шебер-класстың негізгі мақсаты – білім беру үдерісінде кеңінен тарала қоймаған заманауи жасанды интеллект құралдарының мүмкіндіктерін таныстыру, мұғалімнің күнделікті жұмысын автоматтандыруға көмектесетін тиімді шешімдерді көрсету және оқыту сапасын арттыру жолдарын қарастыру.
Шебер-класс барысында Жәкен Нүркен Дәуітбайұлы мұғалімнің күнделікті жұмысындағы қайталанатын міндеттерді жеңілдету, дәстүрлі әдістер мен жасанды интеллект мүмкіндіктерін салыстыру және заманауи білім беру трендтерін қолдану жөніндегі тәжірибесімен бөлісті.
Практикалық бөлімде педагогтерге оқу материалдарын әзірлеуге арналған бірнеше заманауи платформа таныстырылды. Атап айтқанда, Diffit және Brisk Teaching құралдары арқылы мәтіндер мен бейнематериалдар негізінде оқушылардың жас ерекшеліктері мен білім деңгейіне сәйкес тапсырмалар дайындау жолдары көрсетілді. Napkin AI платформасының көмегімен мәтіндік ақпаратты визуалды схемалар мен инфографикаға айналдыру мүмкіндіктері таныстырылды. Ал Gamma App арқылы сұраныс негізінде презентациялар мен оқу карточкаларын әзірлеу тәсілдері ұсынылды.
Шебер-класстың маңызды бөлігі «Менің авторлық ЖИ-өнімім» тақырыбындағы практикалық тренинг болды. Қатысушылар өз смартфондары мен ноутбуктерін пайдаланып, ұсынылған платформаларда жұмыс істеп, алдағы сабақтарына арналған цифрлық оқу материалдарын әзірледі. Бұл жұмыс педагогтерге жасанды интеллект құралдарының мүмкіндіктерін тәжірибе жүзінде сынап көруге және оларды өз пәндерінің ерекшеліктеріне сәйкес бейімдеуге мүмкіндік берді.
Іс-шара соңында фасилитация және кері байланыс ұйымдастырылып, қатысушылар жаңа құралдарды қолдану тәжірибелерімен бөлісті. Қорытынды бөлімде жасанды интеллектінің мұғалім жұмысын жеңілдетудегі, оқу материалдарын түрлендірудегі және оқыту үдерісін тиімді ұйымдастырудағы әлеуеті қорытындыланды.
