https://bilimaktobe.kz/kz/assotsiatsiya-distsiplin#sigFreeId8209d4b70c
БАСТАУЫШ СЫНЫП ПӘНДІК АССОЦИАЦИЯСЫНЫҢ ІІ ОТЫРЫСЫ ӨТТІ
https://bilimaktobe.kz/kz/assotsiatsiya-distsiplin#sigFreeId7159f9d5ad
2026 жылғы 8 сәуірде Қ.Сәтбаев атындағы орта мектеп-лицейінің коворкинг орталығында «Жаңа тұрпатты бастауыш сынып мұғалімі: педагогикалық шеберлік пен білім беру нәтижелері» тақырыбында бастауыш сынып пәндік ассоциациясының ІІ отырысы өтті. Іс-шараның мақсаты – бастауыш сынып мұғалімдерінің педагогикалық шеберлігін жетілдіру, кәсіби құзыреттілігін арттыру және білім сапасын жақсарту бағытындағы өзекті мәселелерді талқылау болды.
Ассоциация отырысының кіріспе бөлімінде Ақтөбе облыстық әдістемелік орталығының жалпы орта білім беру бөлімінің меңгерушісі С.Жубаева сөз сөйлеп, облыста білім сапасын арттыру мақсатында жүзеге асырылып жатқан жобаларға тоқталды. Сонымен қатар бастауыш сынып мұғалімдерінің кәсіби құзыреттілігін дамыту мәселелеріне назар аударып, педагог қызметінің сапасын арттыруға қатысты өз ұсыныстары мен пікірлерін білдірді.
Ассоциация жетекшісі, Ақтөбе қаласындағы №9 орта мектеп-гимназиясының бастауыш сынып мұғалімі Т.В.Михайлова педагогтің кәсіби дамуының негізгі тетігі ретінде өзін-өзі жетілдірудің маңыздылығына тоқталды. Ол қазіргі білім беру кеңістігінде мұғалімнің тек білім беруші ғана емес, сонымен қатар үздіксіз ізденістегі, жаңашыл және зерттеуші тұлға болуы қажеттігін атап өтті.
Әл-Фараби атындағы №21 мамандандырылған гимназияның бастауыш сынып мұғалімі Ж.М.Жарылғасова қалыптастырушы бағалауды ұйымдастыру барысында кездесетін қиындықтар мен оларды шешу жолдары жөнінде өз тәжірибесімен бөлісті.
Отырыс барысында Хромтау ауданы №3 Хромтау орта мектебінің бастауыш сынып мұғалімі Н.Ерназарқызы қазақ тілі сабақтарында қалыптастырушы бағалауды тиімді қолдану тәсілдерін ұсынды. №2 Хромтау гимназиясының бастауыш сынып мұғалімі А.П.Искакова бастауыш білім беру сапасын арттырудың заманауи әдістеріне тоқталса, Ақтөбе қаласындағы KAZGUU мектебінің бастауыш сынып мұғалімі Б.Ж.Мустафин оқытудың тиімді әдіс-тәсілдерін таныстырды.
Сондай-ақ Қ.Сәтбаев атындағы орта мектеп-лицейінің бастауыш сынып мұғалімі Г.Қ.Дощанова оқушылардың дивергенттік ойлауын дамытудың тиімді жолдары туралы баяндама жасап, Байғанин ауданы Қарауылкелді орта мектебінің бастауыш сынып мұғалімі М.Б.Төлекбаева оқу сауаттылығын дамыту аясында мәтінді түсініп оқу дағдыларын қалыптастыру бойынша іс-тәжірибесімен бөлісті.
Отырыс соңында қатысушылар ұсынылған тәжірибелер мен әдістемелік тәсілдер төңірегінде пікір алмасып, өзекті мәселелерді талқылады. Нәтижесінде бастауыш білім беру сапасын арттыруға бағытталған бірқатар әдістемелік ұсыныстар әзірленіп, алдағы жұмыстардың басым бағыттары айқындалды.
БАСТАУЫШ СЫНЫП МҰҒАЛІМДЕРІ ҚАУЫМДАСТЫҒЫНЫҢ ОТЫРЫСЫ ӨТТІ
https://bilimaktobe.kz/kz/assotsiatsiya-distsiplin#sigFreeId21ad962bb1
2026 жылғы 6-ақпанда Ақтөбе облысының бастауыш сынып мұғалімдері қауымдастығының I отырысы өтті.
Қауымдастық жетекшілері №9 орта мектеп-гимназиясының бастауыш сынып мұғалімі Михайлова Татьяна Васильевна мен Әл-Фараби атындағы мамандандырылған гимназияның бастауыш сынып мұғалімі Жарылғасова Жанылсын Майлановна І отырысты «Бастауыш білім берудің заманауи шақырулары: оқу процесінде цифрландыру және жасанды интеллект» тақырыбында өрбітті.
Отырыс аясында бастауыш мектеп тәжірибесінде цифрлық білім беру ресурстарын және жасанды интеллект құралдарын енгізу мәселелері қаралды. Қатысушылар қазіргі технологиялар оқушылардың оқу мотивациясын қалыптастыруға, танымдық белсенділігін арттыруға және жеке оқытуға қалай ықпал ете алатынын талқылады.
Арнайы назар педагогтің цифрлық трансформация жағдайындағы рөліне, жасанды интеллектіні қолданудың қауіпсіздігі мен жас ерекшеліктеріне сәйкестігіне, сондай-ақ дәстүрлі педагогикалық әдістер мен инновациялық тәсілдер арасындағы тепе-теңдікті сақтауға аударылды.
Педагогтер оқу процесінде цифрлық платформаларды, интерактивті тапсырмаларды және жасанды интеллект элементтерін қолдану тәжірибесімен бөлісті, кездесетін қиындықтар мен оларды шешу жолдарын талқылады. Отырыс конструктивті диалог, кәсіби ынтымақтастық және пікір алмасу атмосферасында өтті.
Өткізілген кездесуде педагогтердің үздіксіз кәсіби дамуының маңызы және заманауи шақырулар жағдайында бастауыш білім сапасын арттыру үшін тиімді шешімдерді бірлесіп іздеудің қажеттілігі айтылды.
БИОЛОГИЯ ПӘНДІК АССОЦИАЦИЯСЫНЫҢ КЕЗЕКТІ ОТЫРЫСЫ ӨТТІ
https://bilimaktobe.kz/kz/assotsiatsiya-distsiplin#sigFreeIdcf49aa424e
2026 жылғы 20 сәуір күні Ақтөбе қаласы №56 жалпы орта білім беретін мектебіндегі коворкинг орталығында «Биология пәнінен функционалдық сауаттылық: білімнен - тәжірибеге» пәндік ассоциациясының ІІ отырысы өтті.
Биология пәнінен білім алушылардың функционалдық сауаттылығын дамыту бағытында тиімді оқыту әдістерін анықтау және оларды оқу үдерісінде қолдану, мұғалімдермен тәжірибе алмасу мақсатында өткен отырыста Әйтеке би ауданы Талдысай ЖОББМ биология пәні мұғалімі Лаура Сырмаханова «Тірі ағзалардағы энергияның айналымы және өмір сүру тепе-теңдігі», Ақтөбе қаласы №9 ОМГ биология пәні мұғалімі Жалгас Кукенов «Функционалдық сауаттылықты қалыптастыру – биология пәнін оқытудың стратегиялық бағыты», Ақтөбе қаласы №10 ЖББОМ биология пәні мұғалімі Нурила Есенова «Жасушалық биологияны оқытудағы тиімді әдістер: оқушылардың функционалдық сауаттылығын дамыту» тақырыптарында өз іс-тәжірибелерімен бөлісті. Биология пәні бойынша функционалдық тапсырмалардың мазмұны, құрылымы және оларды оқу үдерісіне кіріктіру жолдары талданды.
Ақтөбе қаласы Благодар ОМ биология пәні мұғалімі Света Абдыкалыкова функционалдық сауаттылықты дамытуға бағытталған тақырыптық тапсырмаларды талдау жолдарына тоқталды.
Қатысушылар тапсырмаларды құрастыруда оқу бағдарламасының талаптарын, пәнаралық байланысты, өмірлік жағдаятты қолдану қажеттігін атап өтті. Сонымен қатар, халықаралық зерттеулер форматындағы тапсырмаларды енгізудің маңыздылығына тоқталды.
Отырыс соңында рефлексия өткізіліп, функционалдық тапсырмаларды сабақта жүйелі қолдану ұсынылды. Пән бойынша тапсырмалар банкін қалыптастыру туралы шешім қабылданды.
https://bilimaktobe.kz/kz/assotsiatsiya-distsiplin#sigFreeIdcf57cc9f2c
https://bilimaktobe.kz/kz/assotsiatsiya-distsiplin#sigFreeIdce059d6a9b
https://bilimaktobe.kz/kz/assotsiatsiya-distsiplin#sigFreeId125e5a402f
ХИМИЯ ПӘНДІК АССОЦИАЦИЯСЫНЫҢ КЕЗЕКТІ ОТЫРЫСЫ ӨТТІ
https://bilimaktobe.kz/kz/assotsiatsiya-distsiplin#sigFreeId4d1a1287d6
2026 жылғы 24 сәуір күні Ақтөбе қаласы №80 жалпы орта білім беретін мектебіндегі коворкинг орталығында «Химия пәні арқылы функционалдық сауаттылықты арттыру: теория мен тәжірибе сабақтастығы» пәндік ассоциациясының ІІ отырысы өтті.
Отырыс барысында функционалдық сауаттылықты қалыптастырудың теориялық негіздері, химия сабақтарында білімді өмірмен байланыстыру тәсілдері, тәжірибелік және зертханалық жұмыстарды тиімді ұйымдастыру талқыланды.
Ақтөбе қаласы №27 орта мектеп-лицейінің химия пәні мұғалімі Ляйля Буркутова «Сабақтағы химия – өмірдегі шешім» тақырыбында химиялық білімнің өмірмен байланысын көрсету жолдары бойынша тәжірибесімен бөлісті.
Мәртөк ауданы №2 Мәртөк мектеп-гимназиясының химия пәні мұғалімі Шолпан Жиенбаева химиялық білімді күнделікті өмірде қолдануға бағытталған әдістерді ұсынды.
Ақтөбе қаласы №82 жалпы білім беретін орта мектебінің химия пәні мұғалімі Әзиза Абылайқызы «Тұрмыстық химия өнімдерінің сапасын титрлеу әдісімен сараптау» тақырыбында зертханалық жұмыстардың тиімділігін көрсетсе, осы мектептің химия пәні мұғалімі Аяжан Боқырова «Ас мәзіріндегі химия: тағамдық қоспалардың (Е-кодтары) адам ағзасына әсері» тақырыбында тағам қауіпсіздігі мәселелеріне тоқталды.
Сонымен қатар, Ақтөбе қаласы №80 жалпы білім беретін орта мектебінің химия пәні мұғалімі, ассоциация жетекшісі Жанат Булекова «Йодометриялық талдау арқылы тағам өнімдерінің сапасын анықтау: білімнен тәжірибеге» тақырыбында тәжірибелік зерттеу жұмыстарын таныстырды.
Іс-шара педагогтердің тәжірибе алмасуына, химия пәнін оқытудағы заманауи әдістерді жетілдіруге және білім алушылардың ғылыми-зерттеушілік дағдыларын дамытуға мүмкіндік берді.
