Ақтөбе облыстық әдістемелік орталығы
Актюбинский областной методический центр

Мектеп басқаруында жасанды интеллект: директорларға арналған оқыту семинары өтті.

Ақтөбе облыстық әдістемелік орталығының жұмыс жоспарына сәйкес жалпы орта білім беретін мектеп директорларына арналған «ЖИ құралдарын мектеп әкімшілігі жұмысына енгізу» тақырыбында оқыту семинары өтті. Семинардың негізгі мақсаты – жалпы орта білім беретін мектеп директорларына заманауи технологияларды тиімді пайдалану дағдыларын дамыту және білім беру сапасын арттыруда ЖИ технологияларының озық үлгілерін енгізу. Семинар Harvard Extension School (Project Management) және Suffolk University (Management & Leadership) түлегі, ЖИ және инклюзивті білім беруге бағытталған жобаларды іске асырушы Жұмаев Мағжан Сәрсенбайұлының спикерлігімен өткізілді.

Семинар барысында қатысушылар жасанды интеллекттің білім беру саласындағы заманауи бағыттарымен танысып, оны мектеп әкімшілігінің күнделікті жұмысында қолданудың нақты жолдарын үйренді. Атап айтқанда, құжат айналымын автоматтандыру, есептер мен талдауларды дайындау, жоспарлау, ішкі коммуникацияны жақсарту және уақытты тиімді басқару мәселелері қарастырылды. Оқыту практикалық форматта өтті: директорлар ЖИ құралдарымен тікелей жұмыс жасап, нақты мысалдар мен кейстер негізінде тәжірибе жинақтады. Сонымен қатар, жасанды интеллектті қолданудағы этика, деректер қауіпсіздігі және жауапты пайдалану мәселелеріне ерекше назар аударылды.
Семинар қатысушылары ЖИ технологиялары мектеп басқаруында тек уақытты үнемдеп қана қоймай, басқару сапасын жаңа деңгейге көтеруге мүмкіндік беретінін атап өтті. Мұндай оқыту іс-шаралары білім беру ұйымдарының цифрлық трансформациясына серпін беріп, мектеп басшыларының заманауи басқарушылық құзыреттерін дамытуға ықпал етеді.
Іс-шара соңында қатысушылар өз пікірлерімен бөлісіп, алдағы уақытта жасанды интеллект құралдарын мектеп тәжірибесіне кезең-кезеңімен енгізуге дайын екендіктерін білдірді.