Ақтөбе облыстық әдістемелік орталығы
Актюбинский областной методический центр

Жобаның мақсаты: Оқу бағдарламаларына ЖИ-ді кіріктіру арқылы білім беру үдерісінің тиімділігін арттыру, оқыту сапасын жақсарту және педагогтер мен білім алушылардың цифрлық құзыреттіліктерін дамыту, сабаққа қызығушылықтарын арттыру.

Жоба мемлекет басшысы Қ.Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауын және Қазақстан Республикасы Оқу-ағарту министрлігінің 2025-2029 жылдарға арналған білім беру жүйесіне жасанды интеллектіні енгізудің концептуалдық тәсілдері мен 2025-2026 оқу жылына арналған Әдістемелік нұсқау хатын басшылыққа алып құрылды.

Пилоттық жобаны іске асыруға 20 мектептің 1147 негізгі пән мұғалімдері, 7-11 кластың 15939 оқушысы қатысады.

Жобаға қатысушы мұғалімдер: 

• ЖИ құралдарын тиімді пайдалана отырып, сабақты қызықты әрі заманауи форматта өткізеді;
• Оқушылардың білім алу қызығушылығын арттыру мақсатында интерактивті тапсырмалар, визуалды материалдар мен адаптивті оқыту жүйелерін қолданады;
• ЖИ көмегімен оқушылардың жеке оқу траекториясын ескеріп, сараланған тапсырмалар ұсынады;
• Сабақтан кейін ЖИ арқылы алынған деректер негізінде оқушылардың жетістіктерін талдайды және кері байланыс береді.

Жобаны іске асыру мерзімдері:

I кезең (дайындық) – пилоттық ұйымдарды іріктеу, ұйымдастыру жұмыстары; (желтоқсан 2025)

II кезең (енгізу және апробация) –пән мұғалімдеріне семинар ұйымдастыру, ЖИ элементтерін оқу және басқару үдерісіне енгізу, мониторинг жүргізу; (қаңтар-қараша 2026)

III кезең (талдау және тарату) – нәтижелерді бағалау, үздік тәжірибені жинақтау және тарату (желтоқсан 2026).